Agneddu lattaricciu è caprettu
« Nustrale » è diliziosi
In Corsica, a pruduzzioni di caprettu è d’agneddu hè isciuta da una tradizioni antica.
Isciutu solu da i razzi pecurini è caprini corsi, l’addevu d’agneddu è di caprettu s’arremba nantu à sistemi pasturali cumplessi chì sò fundati nantu à a ghjistioni di i risorsi d’un tarritoriu è u fattu chì u pastori cunnoschi bè i so animali.
Nutriti à a tasca di a mamma da a nascita sinu à a tumbera, l’agneddu è u caprettu binifizieghjani d’un latti di qualità bunissima, riccu in grassi, in pruteini, in vitamini è in minerali. Issu modu d’addevu dà una carri tennara è savurosa chì si pò tastà arrustita o in salsa.
Sicondu a tradizioni, i ritagliuli (rivia o rivredda in Pumonti è curatella in Cismonti) sò cunsumati in imbruccati cotti à u focu à legnu, inviluppati ind’u velu è intrusciati cù una salsa à l’acetu, o di regula, cotti ind’a frissoghja.
A pruduzzioni d’agneddu lattaricciu è di caprettu si faci da uttrovi à maghju. Sò dunqua prudutti di staghjoni, cunsumati di modu tradiziunali à l’epichi di Natali è di Pasqua.
Oghji, u caprettu è l’agneddu lattaricciu fermani spicialità rinumati di a gastrunumia isulana. D’altrondi, ci sò studii chì sò fatti oghji in privisioni di a ricunniscenza di a so qualità è di a so sputichezza cù a certificazioni Indication Géographique Protégée (IGP) « Agnellu Nustrale » è « Cabri de Corse ».
