Sud Corse
U Lionu di Roccapina fighjula u mari, supranatu da a so chjoma, a vistica d’un casteddu pisanu di u XIu seculu. I tafoni – formi chì venini da a ruditura lenta di u granitu - intratenini l’imaghjinazioni di u visitatori chì scopri u Stremu Meziornu. Rifalendu issa costa salvatica induva a flora è u bistiami ani prisirvatu i so diritti, a putenza di i tarri di u Miziornu piglia u risaltu !
À uni pochi di chilomitri di a cità midievali affascinosa di Bunifaziu è di a cità attraenti di Porti Vechju, a muntagna di Cagna varda i vigni è i pascuri di a dolci piaghja di Figari. È u prufumu incantevuli di a rinumata muredda di Corsica, ci purtarà sin’à a furesta di pini maistosa di l’Uspidali. Po, a fiera Alta Rocca, chjamata « Tarra di i Signori », u cori di u « Dilà da i Monti », suddisfarà tutti i curiusità. Paesi accuglienti, paisaghji naturali eccezziunali è siti archiulogichi sò à u cori d’una tradizioni pasturali forti. U Cuscionu, a pianura di muntagnera a più maiò di Corsica, locu rinumatu duva si cullava l’animali, n’hè u tistimoniu. È sè « u veru prugressu hè une tradizioni tramandata », l’uleicultura in Alta Rocca n’hè a prova viva.
Da veda... Da fà
U Lion’di Roccapina, u furtinu è i rocchi di Bunifaziu, a citadella è i salini di Porti Vechju, i torri ghjinuvesi, i furesti di Bavella, Sambucu, Asinau è Uspidali, i chjassi tematichi di u Cuscionu, i chjassi di u patrimoniu di Quenza, i tragoni, a spiscia di Piscia di Ghjaddu, l'ippudromu di Viseu (u più altu d'Auropa), u Museu di a Preistoria di Livia, i siti prestorichi di Cucuruzzu è di Capula, i castelli d'Araghju è Ceccia, l'ecomuseu di l'alivu di Santa Lucia di Tallà...
Da ùn mancà...
- I marcati di pruduttori.
- I marcati di l’artighjani
- A festa di l'Oliu Novu, à a mità d’aprili in Santa Lucia di Tallà.
- Corsica raid Aventure, da u 7 à l’11 di ghjugnu, à a partenza di Munacia d'Auddè.
- I ‘Médiévales’, u 6 è u 7 di sittembri in Livia.
- I festi catolichi è i prucissiò di Bunifaziu.
