L’olii essenziali corsi
Di natura Biò
L’usu midicinali di i pianti è di i fiori di a machja hè una tradizioni antica in Corsica.
A diversità è a spicificità di a flora isulana sempri prisirvata offrini, oghji, un pannellu largu di spezii distillati pà i so olii essenziali : a murza, a morta, u rosumarinu, u lariciu, l’astratella, u listincu, u finochju, a baschichja ...
Issa ricchezza fiuristica, assuciata à una maestria sana di a cunniscenza di u ciculu di a pianta è di a so cugliera sinu à a distillazioni in oliu essenziali, offri a guaranzia d’una qualità unica.
Pà fà durà issa risorsa naturali, in Corsica, a cugliera hè rigulata. Hè urganizata sicondu un quaternu di carichi chì difinisci à tempu i fraquenzi è i mumenti favurevuli, a parti da coglia è i quantità da lascià pà a ripruduzzioni.
L’olii essenziali d’agrumi venini à allargà u rigistru di i pianti aromatichi è midicinali. Sò stratti di a buchja (com’è l’oliu essenziali di clementina) o di i fogli (di clementinu).
Ci hè da nutà chì tutti l’olii essenziali sò labillizati in Agricultura Biulogica.
L’olii essenziali sò aduprati cù scopu midicinali, in farmacia, in cusmetica, in parfumaria è certi volti in cucina.
L’acqua utilizata pà a distillazioni essendu franca d’ogni trattamentu, ‘l’acqui fiurali’ isciuti da l’estrazzioni di l’olii essenziali corsi binifizieghjani d’una qualità maiò è venini à cumplittà u rigistru di i prudutti.
