U Brocciu
Idei falsi, ma vera eccezzioni !
Innò, u brocciu ùn hè micca a virsioni corsa di a parolla brousse. Un’ si pò traducia, u brocciu hè corsu, puntu è basta ! À u plurali, hè brocci, chì unu solu ùn vi bastarà !
U Brocciu binifizieghja d’un’Appillazioni d’Orighjini Cuntrullata è di l’equivalenti auropeu, l’Appillation d’Orighjini Prutetta.
- Stranu : pò essa di latti caprunu o picurinu, o ancu i dui mischiati.
- Eccezziunali : hè l’unicu furmagliu francesi in AOC isciutu da u seru (lactosérum).
- Stunanti : À u seru cù u sali, s’aghjusta à u più 25% di puricciu.
A pruduzzioni di brocciu principia di nuvembri, dopu à smammera di l’agneddi è di i capretti, è si compii di maghju/ghjugnu, epica duva u latti diventa menu riccu.
Di fatti, u brocciu devi cuntena o mancu 40% di grassi pà binifizià di l’Appillazioni d’Orighjini Cuntrullata. Sottu à issu parcintuali, u pruduttu fabricatu hè chjamata par isbagliu « brousse ».
U brocciu pò essa dinò staghjunatu. In issu casu, hè salitu à seccu ind’ì sopra dopu à 24 ori di sgottu po traspurtatu ind’una sala fresca duva pò stà da 15 ghjorni à parechji mesi. Sicondu a quantità di sali aghjustatu è a durata di staghjunata, u brocciu pò essa chjamatu « passu » o « seccu ».
U brocciu cunveni assai bè à a pastizzaria (fiadone, imbrucciate…) o à i priparazioni culinarii (artichjocchi pieni, frittata cù a menta …)
Si pò tastà dinò cusì senza nudda, di manera simplici, o cù à pena d’acquavita di mortula !
