A clementina di Corsica
Un’ ingurdizia di poca durata…
A clementina hè isciuta d’un cruciamentu naturali trà u fiori di mandarinu è l’amacu di citrò. Ci veni da l’altra sponda di u Mediterraniu duva fù scuparta, centu anni fà, ind’a piantazioni d’una casa d’orfani vicinu à Oran in Algeria da u preti Clément, è da quì u so nomi.
A clementina di Corsica hè a sola clementina francesa. A pruduzzioni hè lucalizata bè ind’a piaghja urientali di l’isula. A racolta si faci da uttrovi à ghjinnaghju sicondu i variità chì poni essa primaticci (Caffin), di staghjoni (Commune SRA è Oraval) o tardivi (Nules).
A Clementina di Corsica binifizieghja d’una Indicazioni Giugrafica Prutetta (IGP) chì guarantisci a so qualità, a so traciabilità è a so friscura.Issu segnu di ricunniscenza auropeu assicura dinò una prutizzioni di l’urighjini cunsidarendu chì a Clementina di Corsica binifizieghja di qualità chì venini da u lucali è da u sapè fà spicificu di l’arburicultori di l’isula.
A so peddi fina è luccichenti piglia u so culori è a so maturità nantu à l’arburu di modu naturali, senza attivatori. In principiu di staghjoni, pò essa verdi in parti sempri essendu matura parchì hè u fretu chì dà una pimintazioni arancia à a peddi. Hè colta di mani cù i so fogli. I pruduttori indiati ind’ì l’IGP praticheghjini un’agricultura rispittuosa di l’ambienti.
Ricca in vitamini è in oligò elementi, issu fruttu suchjosu cù un gustu acidulu è dilicatu hà da assulanà i vostri inguerni !
