U picurami

A Pecura Corsa

Aghja d’addevu

L’addevu picurinu hè praticatu nantu à l’insemi di u tarritoriu isulanu

Discrizzioni

Di regula, a pecura corsa hè chjuca di statura, da 50 à 60 cm, è u so pesu hè riduttu, da 35 à 40 chilò. A statura di u muntoni pò andà sin’à 70 cm pà un pesu di 60 à 70 chilò. A pecura hà un capu assai finu, una faccia longa è un fruntali sciacciatu o à pena gonfiu cù a prisenza di corri o micca. L’arechji sò chjuchi, bassi è purtati guasgiu à l’urizuntali. Di regula, sicondu u mudellu di a razza, i muntoni sò curnuti. I corri sò larghi, abbucinati à lumaca è piazzati in daretu. U corpu di l’animali hè rigulari, longu, u spinu drittu, una groppa stretta è un cusciottu pocu sviluppatu. A lana cunteni peli longhi è ricopri u corpu sanu di l’animali cù longhi micci, ciò chì parmetti à i bandi di stà fora è di viaghjà tutta l’annata.

Carattaristichi è capacità spicifichi

A pecura corsa faci parti di a famiglia di i razzi di pilamu longu di u Mediterraniu. I so membri sò à veru fini è adattati à parcorsi longhi à nantu à lochi difficiuli è muntagnosi. U culori di a lana ùn hè fissu. Cusì si pò scuntrà animali cù i lani neri, rossi o bianchi è grisgi. U so puppulu hè sviluppatu è furmata ‘in puppulu di capra’ ciò chì li dà una facilità di mugnera assai particulari.

Prisenza storica

À u Nioliticu anticu (Vu millenariu nanzu à C.), l’essenziali di u nutrimentu in carri di l’abitanti di l’isula era datu da l’animali mansi : porcu, muntoni è capra (Vigne, 1995). Si pò ricuddà ind’i tempi, pà a mimoria cullittiva corsa, a pecura hè sempri stata una di i ricchezzi maiò di l’isula. Hè da sempri un punteddu di l’ecunumia agrupasturali di l’isula. A pupulazioni isulana si hè stallata ind’i righjoni muntagnosi duranti parechji seculi, sviluppendu cusì un’agricultura pà u cibu basata nantu à l’addevu estensivu di pecuri è capri. I pastori corsi ani sviluppatu un sistema urighjinali di tramutà doppiu : l’inguernu u longu di u liturali, duva a dulcezza di u clima parmittia di fà pascia i pecuri in lochi padulosi, è l’istati in alta muntagna, pà fughja a malaria chì infistava issi lochi duranti stu periudu è prufittà di i pasculi di muntagna.
A pruduttività debuli di u travagliu, u fattu chì certi faccendi si faciani à tempu è i prublemi liati à a cunsirvazioni di i prudutti favurizavani aiutu, scambiu è trasmissioni trà ghjinirazioni di i sapè ind’i paesi. À u principiu di u XXu seculu, a logica di u funziunamentu agrupasturali fù rimissa in causa da scunvugli maiò, chì ani favurizatu a disurganizera di u tissutu suciali è una disertificazioni di l’internu. In issa calata prugressiva, chì hà toccu parechji sittori agriculi, l’addevu picurinu fù menu toccu cù a ghjunta di l’impresi di Roquefort à a fini di u XIXu seculu ; un avinimentu chì hà missu in strada a sfarinziazioni trà i filieri picurini è capruni (Bouche, 2006). A stallazioni di issi impresi lattaghji in Corsica hà da scuzzulà l’ecunumia di mantinimentu è fà entra à pocu à pocu l’addivatori picurini ind’ì l’epica industriali. À parta da 1950, l’addevi picurini s’ani da sidentarizà di più in più nantu à i piaghji liturali è abbandunà a doppia muntagnera è pà certi a muntagnera d’istati.

In 1986, u schema di silizzioni di a pecura corsa hà principiatu sottu à a rispunsabilità di a Federazioni Righjunali Corsa di Silizzioni Ovina (FRECSOV) divintata in 1994 UPRA (unioni di prumuzioni di a razza) po OS (urganisimu di silizzioni) in 2006.

Modu d’addevu è valurizazioni

In Pumonti, l’addivatori picurini ani di regula da 100 à 150 pecuri è sò pà u più pasturecci, vali à dì chì l’addivatori trasfurmeghjani è cummircializeghjani a tutalità di a so pruduzzioni. In Cismonti, i splutazioni picurini prisentani, di media, da 250 à 350 pecuri, è pà a maiò parti porghjini u so latti à l’industria furmagliaghja lucali.

A tipulugia di l’addevi picurini hè varia :

• In zona di piaghja asisti un sistema intensificatu duva certi addivatori, par via d’una maestria di u fundiariu è l’utilizazioni di tarri lavurevuli è annacquevuli, ani missi in ballu addevi cù effetivi di pecuri impurtanti, purghjendu u latti à industriali lucali è chjamendu à spessu parsunali salariatu. In issu tippu di splutazioni, l’addevu di pecuri hè suventi assuciatu à a viticultura, l’arburicultura o i culturi di a biada.
• Ind’ì l’internu di l’isula, si vedini addevi famigliali custituiti d’un numaru di pecuri menu impurtanti chì arrecani u so latti o u trasfurmeghjani. A so situazioni fundiaria hè à spessu incerta è i parcorsi sò di primura ind’u sistema di pruduzzioni. In issu tippu di splutazioni, l’addevu di i pecuri hè assuciatu à un addevu vaccinu chì dà u latti è fattu di modu estensivu.
• Trà issi dui sistemi di pruduzzioni, ci hè una maghjurità d’addevi di piemonti, lucalizati pà u più ind’i lochi liturali di l’isula, induva sò à cantu purghjitori di latti è trasfurmatori pasturecci. Sò anzituttu addevi famigliali spicializati chì ùn ani micca altra pruduzzioni cà quidda picurina è duva l’intensificazioni di furaghju svarieghja trà i dui sistemi ammintati nanzu.

Epica di pruduzzioni

A mugnera di i pecuri hè fatta da uttrovi à a fini di lugliu. Figliani à a fini d’istati è di vaghjimu.