Aghjugna à u vostru librettu di strada

Alix GAUFFREAU

Atelier ATLETICO

Sellaghju capace à fà i furnimenti

Accolta : Tuttu l’annu, da u luni à u vennari o pigliendu un appuntamentu

I tarritorii : Sartinesi Valincu Taravu

I catigurii : L’artighjani

Ghjè nant’à a cumuna d’Albitreccia ch’ella hà creatu Alix Gauffreau u so attellu di selleria. Hè da l’età di trè anni ch’ella a si divureghja a so passione per u cavallu è ne hà sempre vulsutu fà u so mistieru. “À l’iniziu, u mo sognu era d’integrà a guardia republicana à cavallu ma era troppu chjuca per integrà stu corpu di a Gendarmeria Naziunale”, cunfideghja Alix.

Ùn hè micca Alix di quelli chì si piantanu à u primu trampalu è ripiglia prestu u sellatu cù un’altra idea in capu. “Mi sò avvista chì ùn ci era più sellaghju capace à mette i furnimenti in Corsica.” “L’ultimu chì ci era, in Aiacciu, hà piantatu a so attività vint’anni fà”, seguita a donna. Hà decisu Alix di parte in Cuntinente à furmà si in Donzy, un paisolu di Burgogna. Ci ampara a donna tutte e tecniche di a prufessione, à fiancu à un sellaghju sperimentatu, durante dui anni.   Buscatu si u CAP, volta in Corsica Alix è decide di stallà si ind’è ella, in Albitreccia, cù l’aiutu di i so parenti. “M’anu sempre sustenuta inde i mo prugetti. À principiu u mo babbu m’avia lasciatu a rimessa, avemu fattichjatu per fà u mo attellu cù materiale di ricuperazione”, s’arricorda a donna, chì v’accoglie oghje inde un bellu attellu novu novu, à u quale hà datu u nome di u so cavallu, Atletico.

Hè Alix a sola diplumata in Corsica à fà u mistieru di sellaghja è capace à mette i furnimenti, po hè digià riesciuta à fà si una clientela fidata. “Hè un mistieru chì campa assai per via di u passaparolla. Travagliu cù i particulari è e stalle di pruprietarii”, spieca a donna. Si spiazza dinù Alix ind’è i so clienti ma ancu per ste fiere agricule di Corsica è i saloni internaziunali cum’è u 5 stelle di Pau è Equita Lyon (cù l’aiutu di l’Adec è di a Cullettività di Corsica), ciò chì li dà l’uccasione di scuntrà a so clientela è di fà scopre a so attività. “Facciu tuttu à a manu inde u filu di a tradizione di a selleria francese, hè un mistieru chì dumanda à spessu tempu, pazienza è rigore”. Tandu ripiglianu vita e selle, cavezze, chemi da spassighjà, ma dinù e cinte, i cinturoni o i stucci per i cultelli, inde e mani di sta donna giovana è passiunata.