Aghjugna à u vostru librettu di strada

Julien TRUCHON

Attellu terraglia è ceramica - Arti dicurativu di a tola

Accolta : Tutta l’annata - da u luni à u sabbatu 9-12/15-19

I tarritorii : Nebbiu - Capi Corsu

I catigurii : L’artighjani

Sò veri miraculi i so criazioni ! Miraculi nati da l’unioni parfetta trà Ochju è Gestu. Un pocu d’Acqua, di Tarra, di Focu. Eppuru ci hè tuttu. Po era scrittu tuttu : Julien Truchon hè ceramista è i so criazioni aduniscini tutti st’elementi upposti cun formi, mutivi è culori chì eddu solu pudia invintà.

Chì strada par ghjunghja à sti punti ? Iniziatica ! Mudellà a tarra, fabricà l’ughjetti, falli siccà, falli cocia…Gesti naturali par st’omu ghjovanu, chì ziteddu dighjà, ghjucaia in a buttrega di pignulaghju di u babbu. « …ma hè stata bedda più tardi chì a me brama di crià m’hà purtatu à travaglià st’arti è ch’edda m’hè piaciuta. »

Prima di ripiglià a buttrega di u babbu in Patrimoniu, Julien parti à amparà in Bourgogne, in una di i scoli i più alti. A so ambizioni hè d’andà sempri più luntanu è amparà sempri di più. Hè un viaghju à u Ghjapponu chì schiarisci a so strada. In più di u sapè fà tradiziunali aghjusta un stili ch’ùn si pò cunfonda. A pricisioni di l’ochju. A putenza di u gestu. A criatività artistica…Sareti maravigliati scuprendu oghji in a so buttrega i formi puri è rozi, i guarnituri graffichi, i culori cumplessi è sgradati…Julien Truchon si faci valè ancu à u stragneru par l’arti di a tola è a criazioni di ughjetti dicurativi magnifichi…Sò criazioni unichi o in serii assai limitati…È ch’ognunu si pò cumprà !