Aghjugna à u vostru librettu di strada

Claude BLANC

Oliu d’aliva AOP

Accolta : Tutta l'annata, nantu à appuntamentu.

I tarritorii : Dui Sevi-Dui Sorru - Cruzini - Cinarca

I catigurii : In ghjiru à l’alivu è u castagnu

I pruduzzioni agriculi : Oliu di Corsica

Trà equilibriu è passioni

À guasgiu 400 metri d’altezza, nantu à u fiancu di u monti San Damianu, Claude Blanc hà avutu a bona idea di cuntribuiscia à dà torna à a so righjoni a so prima vucazioni. Ci vò à dì chì a so prifirenza à eddu, hè u gustu di i meli posti da u so missiavu…

U paesi di Sari d’Urcinu supraneghja a Cinarca, una vaddi fatta d’anziani orti chì vani sinu à u mari. Hè à mezu à issa vaddi, sottu à a prutizzioni di a cappella rumani San Ghjuvà chì Claude si ritrova oghji à ammaistrà un alivetu ghjovanu.

« Nostalgicu di tutta a ricchezza di u nostru patrimoniu chì hè statu tralasciatu… socu sempri statu maravigliatu da l’estetica d’una tarra travagliata bè. » Allora, à rombu di travagliu è d’energia, è cù l’aiutu di a so famiglia, hà rifattu i tarreni in mezanii, hà smachjatu, hà postu…

A so pruduzzioni, cù un gustu cusì particulari è labillizatu AOP Huile Corse-Oliu di Corsica, veni da u mischiu di dui variità d’alivi nustrali : a Sabina è a Ghjermana. U risultatu : un suchju di fruttu sputicu cù un savori fini ! Ci vò à dì chì da a smachjera à l’etichetta, quì tuttu hè travagliatu cù accuratezza è attinzioni custanti ! Un’ mancava più cà un mulinu pà assicurà un tempu ancu più cortu trà a racolta è a franta…Hè oghji fatta : un pocu più insù, in paesi. A vendita si faci sopra à locu è in parechji buttreghi spicializati.