Aghjugna à u vostru librettu di strada

Ange-Xavier POLI

Furmagliu caprunu

Accolta : Da nuvembri à a fini di lugliu Splutazioni : Rusazia

I tarritorii : Dui Sevi-Dui Sorru - Cruzini - Cinarca

I catigurii : L’addevu, a robba purcina, i casgi

I pruduzzioni agriculi : U casgiu corsu

Nanzu à eddu, u so babbu è i so zii erani addivatori è Ange-Xavier hà sempri battutu u so Cruzinu nativu, à fiancu à elli, Par ciò chì tocca à a so urientazioni prufiziunali, ùn s’hè mancu posta a quistioni : hà presu a seguita di i so missiavi è cuntinuvatu cusì à tramandà a tradizioni è a vita agricula di u paesi.

Ind’è Ange-Xavier Poli, u stintu agriculu ferma vivu ind’ì l’abitanti chì campani sempri o pà un tempu in Rusazia, com’è arradicatu ind’un incuscenti cullittivu fora di tempu. Tutti i cugini è amichi venini à aiutà lu quandu veni l’epica di figlià pà i capri. Fighjulendu li, si vedi tuttu u pesu d’una cultura agricula millenaria tramandata da ghjinirazioni in ghjinirazioni. Ognunu sà ciò chì li tocca à fà è Ange-Xavier Poli a sà ancu eddu !

Parchì hè dinò un agricultori mudernu è cuscenti chì hà sappiutu addattà è diversificà i so attività prufiziunali pà cuntinuà à campà quì. Sè l’inguernu l’addevu caprunu li piglia assai tempu, a muntagnera d’istati li parmetti di cunsacrà si à a so piccula ustaria à tagliu di fiumi, mentri chì a so sposa, Marie-Pierre, l’aiuta cù un puntu di vendita in Vicu.

Avarà a paurà Xavier d’una calata di a vucazioni agricula in a so famiglia ? Mancu à pena, u so fratellu eddu dinò sparti cun eddu issa passioni di a tarra è u so figliolu u più ghjovanu, Ghjulianu, pari avè un’idea bedda pricisa di u so avvena in paesi. Ci hè un’eredità di tradizioni !