Aghjugna à u vostru librettu di strada

Mathilde POGGIOLI

Oliu d’aliva AOP

Accolta : Tutta l’annata. 9h30 - 20h

I tarritorii : Nebbiu - Capi Corsu

I catigurii : In ghjiru à l’alivu è u castagnu

I pruduzzioni agriculi : Oliu di Corsica

Avarà un’anima l’alivu ? In cumunioni cù st’alburu generosu è immurtali, Mathilde Poggioli ni hè sempri stata cunvinta. È li pari ch’era dighjà scritta quand’era chjuca ch’avissi da duvintà uleicultrici.

È dopu ? Una cria di furtuna, appena d’uttimisimu, un travagliu accanitu, u tuttu cù una sfarinatura di passioni chì ùn pò faltà…

Hè stata una sosula bona : in u 1984, acquista cù u maritu annantu à a cumuna di San Gavinu di Tenda, tarreni induva l’alivi erani dighjà  maestri. « Avemu apprufittatu di l’alburi prisenti par principià a sfruttera. » Dipoi stu tempu a so pruduzzioni d’oliu d’aliva AOP hè duvintata una storia di famiglia. « Tutti m’aiutani. U me maritu è u me figliolu cogliini l’alivi in i reti, po i purtemu à u fragnu. A me figliola dà capu à a distribuzioni in i buttreghi in San Fiurenzu è in Bastia. »

Mathilde pruduci u so oliu solu à partasi d’alivi di a varietà endemica di u Nebbiu : a Biancaghja. Aghjusta : « Vogliu  pruducia biò, hè ciò chì cercu à fà avà … »

Dolci, cun gusti di frutti, st’oliu hè in vendita in a risidenza di famiglia è in parechji buttreghi di u rughjonu. Sarà parchì l’alivi cintunarii di Malthide t’ani un’anima bona chì st’oliu squisitu dà un sapori cusì particulari à i vostri piatti ?